Светот пред да заспијам

Моето име е Карас Јонут. Јас сум семеен човек од Романија – имам 36 години, оженет сум и имам еден мал ангел кој се вика Јоана и има скоро 3.5 години. Го сакам својот живот, моето семејство, но исто така сакам и да патувам. Каде и да одам, се обидувам да направам некоја лудорија, на пример танцувам, а понекогаш и врескам на улица – немам никаков проблем да ги изразам своите чувства на јавно место.

Својата страст кон фотографијата и дигиталната уметност ја открив пред десеттина години. Фотографијата ви дозволува да го видите тоа што другите луѓе не можат, да овековечите уникатни мигови и чувства. Својата инспирација ја црпам од разни извори: интернет, филмови, анимации и сѐ што е лудо или фантастично.

Во својата работа доста употребувам Фотошоп. Уживам да фотографирам и потоа да ги едитирам создавајќи нови концепти – надреални, прекрасни, магични.