Чистач во Саудиска Арабија, по потекло од Бангладеш, бил сликан како копнежливо гледал во излогот на една златарница во Ријад, главниот град на Саудиска Арабија. Сликата била објавена на Инстаграм со коментар: „Овој човек заслужува да гледа само во ѓубре.“
Суровата објава го привлекла вниманието на филантропот Абдула ал-Кахтани кој на својата Твитер сметка Енсанијат (хуманитарност) покренал кампања да се најде човекот. По илјадници ретвитувања и споделувања на сликата на интернет, набргу луѓето почнале да увидуваат каде била сликана сликата, и тоа врз основа на одразот во стаклото на излогот. Така чистачот бил идентификуван како Назер ал-Ислам Абдул Карим.
Кахтани изјавил:
„Три часа по мојот твит, кој беше споделен преку 6000 пати, го најдовме.“
Кога луѓето на Твитер ја виделе втората фотографија, го прашале како можат да стапат во контакт со него, по што му пратиле подароци. Му овозможиле да си избере златен сет од истата златарница, а исто така добил и донации во готовина, Ајфони и телефони Самсунг Галакси, како и билет за да може да се врати дома. Една компанија за ориз пак му подарила вреќи со ориз.
Абдул Карим изјавил:
„Јас само си ја работев својата работа како чистач во општината и се најдов пред излогот на златарницата. Многу сум среќен поради подароците и многу сум благодарен.“
