64-годишниот Љубиша Милетиќ од селото Скорице во Србија би требало наскоро да го оствари својот животен сон и да полети со хеликоптерот кој самиот си го направил. Тој изјавил дека нема намера да лета ни високо, ни далеку, туку на некоја од ливадите крај неговото село накракто да го крене хеликоптерот од земја. До идејата да направи свој хеликоптер Милетиќ дошол уште во 1972 година, кога бил војник кој постојано ги обезбедувал воените полигони крај Ниш, Лесковац и Врање на кои слетувале овие летала.
Хеликоптерот со должина околу пет метри и висина околу два ипол метри Милетиќ почнал да го прави во 1985 година по нацртите кои ги добил од своите познаници инженери, пилоти и авиомеханичари. Конструкцијата на леталото го направил од специјални челични цевки со тенки ѕидови, главата на роторот ја набавил на отпад и е од стар руски хеликоптер, моторот го зел од еден стар цитроен, а седиштето од фиќо, додека сите останати делови ги направил сам рачно или со помош на машини.Според неговите пресметки, досега во хеликоптерот вложил околу 20 000 евра.
„Конструкцијата со моторот ја направив сам работејќи деноноќно околу дваесеттина дена. Но, потоа полни дваесет години не успеав да ги набавам пропелерите за целосно да го составам“, вели Милетиќ.
Откако ги направил елисите од специјален алуминиум набавен во Германија, Милетиќ продолжил постојано да го усовршува своето летало.
„За да го кренам хеликоптерот од земја ми остана уште да ги избалансирам пропелерите и бројот на вртежите да ги зголемам од сегашните 250 на 400 до 420 вртежи во минута“, објаснува Милетиќ.
Овие денови тој трага по инженер или пилот кој би му помогнал околу балансирањето на пропелерите, а во меѓувреме се обидува сам да го реши тој проблем поради кој неговиот хеликоптер е недоволно стабилен.
„Јас сум како Ѓоковиќ, сам против сите. Немам ничија поддршка, никој не ми верува дека ќе успеам да полетам, но тоа сигурно ќе го сторам. Сакам на сите да им докажам дека сум успеал, дека мојот труд не бил залуден“, порачува овој ентузијаст кој во целиот негов крај е познат пред сѐ по тоа што за селската изложба направил минијатурен трактор од дрво.
Сега за сега, ако ништо друго, си има свој уникатен клима уред.
