Понекогаш едноставно морате да избегате од сѐ – буквално да избегате – но можеби помислата на дивината без современите удобности не ви се допаѓа многу. Токму затоа „Куќата во морето“ би можела да биде најдоброто одредиште за одмор ова лето, ако не друго, барем во мечтите.
Куќата се наоѓа на еден мал остров (кој повеќе изгледа како една голема карпа) во близина на англискиот брег во Њуквеј, Корнвел. Пристап до куќата се остварува единствено преку еден мост од соседниот остров. Штом ќе го минете мостот, веднаш сте заштитени од останатиот свет во вашата островска тврдина. Куќата се изнајмува лете и за викенди. Како што и погодувате, воопшто не е ефтина.
Внатре куќата е опремена со сите потребности, а дури има и затворени градини и целосно опремен бар. Куќата може да смести четири луѓе. Ги има сите современи удобности, па така иако сте изолирани на овој мал камен во океанот, сепак можете да гледате телевизија.
За екстра одмор, можете да нарачате и кетеринг услуга, при што директно во куќата се донесуваат кошници со храна и пијалоци. Можат да бидат нарачани и спа третмани. Се разбира, ова дополнително може да ги зголеми трошоците, но нели тука си мечтаеме, така што, ако мечтаете, мечтајте со стил.
