Стив Џобс рекол: „Веќе 33 години секое утро се погледнувам во огледало и се прашувам: Ако денес беше последниот ден во мојот живот, ќе сакав ли да го правам тоа што го правам денес? Кога неколку дена по ред одговорот беше `не`, знаев дека е време за промена.“ А Вилбер и Олвир Рајт, пионерите во авијацијата, ги кажале следните зборови: „Едвај го дочекуваме утрото за да се зафатиме за работа“.
За жал, ние често паѓаме во следната противречност: „Тоа за кое ми плаќаат не ми носи радост, а тоа кое го сакам не ми носи пари“. Да, тоа изгледа како слепа улица без излез, како спирала од која нема извлекување А резултатот на тоа е силно чувство на незадоволство, апатија, демотивација и постојан стрес.
Но, Јапонците го велат следното: Секој човек има свој икигај. Некои го откриле и го осознаваат, други го носат во себеси, но сѐ уште го бараат. Икигај се крие внатре во тебе и бара постојано и трпеливо истражување, за да достигнеш во најдлабоките пори на своето постоење и да го најдеш. Но, штом ќе најдеш, сѐ што треба да правиш е секој ден да го храниш, давајќи смисла на своето суштествување. Тогаш и најобичната задача се претвора во вистинска среќа.
Значењето на јапонскиот збор „икигај“ може да се опише на следните начини: „причината поради која секое утро стануваш од леглото“, „радоста секогаш да си зафатен“, „страста која ти носи задоволство и радост“…и сите овие објаснувања водат кон едно – причината да живееш! И изгледа ова е едно од објаснувањата за долговечноста на Јапонците, особено на островот Окинава – едно од местата со најмногу долговечни во целиот свет. И токму од таму потекнува зборот „икигај“, нешто што според локалните жители е поважно дури и од здравата исхрана.
На Окинава секој Јапонец го знае својот икигај и живее во согласност со него; и рибарот кој секое утро со својот чамец излегува на отворено море, и калграфот застанат пред своето платно, и готвачот кој веќе половина век не запира да подготвува суши за своите клиенти.
Краткото енциклопедиско објаснување гласи: Икигај е јапонски поим кој значи смисла на животот, чувство за полза во животот. Зборот е присутен во јапонскиот јазик речиси седум векови. Икигај може да биде професија, хоби или семејство, и редица проучувања посочуваат кон статистички веродостојна взаемна врска меѓу присуството на икигај во животот на еден човек и ниското ниво на стрес, а исто така и со чувството на добро здравје.
На Запад исто така имаме поими кои донекаде соодветствуваат на икигај – животна мисија, реализација. Но, разликата е во тоа што тие се јавуваат како плод на длабока умствена, речиси филозофска дејност, за разлика од јапонскиот икигај. Јапонците внесуваат поголема јаснотија во сето тоа: Што е смислата на животот? Што ми носи радост и страст? Слично како и кај нас, нели? Но, тие додават – и полза за другите.
Треба да си ги поставите овие прашања, длабоко да размислите и одговорите да ги побарате длабоко во себе, бидејќи само таму и можете да ги најдете.
