Пивскиот бренд со најдолга традиција во земјата – СКОПСКО доби нова екстензија на брендот, втора во последните две години. Најновата инвестиција на Пивара Скопје АД во развојот на пивската култура во Македонија и домашната индустрија е СКОПСКО Темно.
„Респектирајќи го огромното значење на СКОПСКО за домашната пивска индустрија, неговата репутација кај љубителите и неговите вредности како бренд кои се препознаени и прифатени од зедницата, одлучивме дополнително да вложиме во неговиот развој. Со инвестицијата во новото СКОПСКО Темно, Пивара Скопје ја потврдува својата долгорочна стратегија и огромна посветеност на развојот на домашниот пазар на пиво, а со тоа и на својот придонес кон развојот на македонската економија“, изјави генералниот директор на Пивара Скопје, Александар Ружевиќ, потенцирајќи дека успешното лансирање на единственото домашно темно пиво на пазарот е резултат на „огромните напори и залагања на вработените во Пивара Скопје“.
Покрај темната махагони боја, која произлегува од двојно печениот јачменов слад, новата бренд екстензија на СКОПСКО поседува и други уникатни карактеристики, како што е богатата и цврста пена која овозможува задржување на неговата свежина и богат вкус со заокружен благо горчлив финиш, со што потсетува на најпознатите баварски пива, без притоа да загуби од својата автентичност.
„СКОПСКО Темно се произведува по оригинален рецепт на пивските мајстори во Пивара Скопје. Тоа претставува совршен микс на квалитетни природни состојки: темен јачменов слад, хмељ, квасец и вода; најсовремена технологија и големо искуство, знаење, љубов и страст кон пивото. Убеден сум дека со ваква уникатна комбинација новото македонско темно пиво ќе биде вистински хит меѓу пивските сладокусци во земјава“, вели менаџерот за производство на пиво во Пивара Скопје, Кирчо Стојанов.
Водејќи се од искуствата во земјите со долга и богата пивска традиција, СКОПСКО Темно ќе биде достапно на пазарот претежно во зимскиот период, кога консументите преферираат темни пива со исклучително богат вкус.
„СКОПСКО секогаш бил двигател и предводник во воведувањето новини на пазарот во Македонија. СКОПСКО Темно е подарок за нашите потрошувачи, кои се верни на овој бренд 90 години и е производ кој ќе помогне во развој на целата пивска категорија“, изјави комерцијалниот директор на Пивара Скопје, Витсе Мутерс.
Новото СКОПСКО Темно, произведено во Пивара Скопје, ќе биде достапно за сите љубители на пивото во земјава во повратна стаклена амбалажа од 0,3 и 0,5 литри, како и точено, по конкуретна цена која одговара на врвниот квалитет на ова уникатно пиво.
